Ditën e sotme është marrë një vendim nga tryeza për Reformën Zgjedhore.
Mësohet se listat e hapura dhe sistemi zgjedhor do të diskutohen në mbledhjen e rradhës që do të mbahet më 6 mars.
Deputetja e opozitës së re Rudina Hajdari, e cila është njëkohësisht dhe bashkëkryetare në Komisionin e Reformës Zgjedhore, deklaroi gjatë një prononcimi të shkurtër për mediat se nuk do të tërhiqet nga ndryshimi i sistemit.
Ajo shtoi se opozita parlamentare do të paraqesë propozime konkrete lidhur me sistemin dhe listat e kandidatëve për deputetë.
Në të njëjtën kohë Hajdari nuk e ka kursyer edhe një batutë indirekte për presidentin Ilir Meta, i cili mblodhi dje shqiptarët në një tubim përpara kryeministrisë me qëllim mbrojtjen e Kushtetutës.
“Nuk mjafton të dalim të ulërasim në sheshe, por të hapim sistemin. Kjo gjë nuk po ndodh sot. Ne duhet të tregojmë popullit se jemi këtu për ata dhe se nesër përfaqësimi i tyre do të jetë i denjë. Uroj që javës tjetër të vijojmë misionin për hapjen e listave për një sistem të barabartë për të gjithë”, tha ajo, duke thumbuar kështu haptazi Kreun e Shtetit.
