Mbaron “muaji i mjaltit” mes Buzhalës dhe Vetëvendosjes/ Vetëvendosja reagon ashpër ndaj tij

Gazetari Berat Buzhala, ka akuzuar Lëvizjen Vetëvendosje se dy persona të saj, kanë dashur ta sulmojnë sonte në një barnatore në Prishtinë.

Menjëherë pas deklaratës ka reaguar zëdhënësi i Lëvizjes Vetëvendosje Arlind Manxhuka, i cili e ka quajtur shpifje akuzën e Buzhalës.

Manxhuka ka thënë se Buzhala ishte ngutur qëllimisht edhe kur ishte sulmuar me vezë zëvendëskryeministri Avdullah Hoti, duke akuzuar aktivistët e VV-së.

“Kjo është e ultë dhe jonjerëzore. Mos krijo gjëra të paqena. Lëvizja nuk ka sulmuar asnjëherë individë e gazetarë, madje as kur kanë cytur policinë për arrestime e deportime të aktivistëve tanë”, ka shkruar zëdhënësi i VV-së.

Postimi i plotë:

Ngutia për të quajtur dikë kinse i paska treguar një vajzë e kinse edhe ajo i paska dëgjuar disa persona duke folur tregon për një shpikje dhe shpifje të ultë.

E njëjta nguti e qëllimshme ishte edhe kur ndodhi sulmi me vezë ndaj Zv.Kryemnistër Avdullah Hotit, u tha se u sulmua nga aktivistë të VV-së.

Në këto kohë kur të gjitha kapacitetet tona organizative i kemi te ndihma për të parandaluar epideminë Covid19, del Berati me dy “kinse” dhe na bëhet lajm. Kjo është e ultë dhe jonjerëzore. Mos krijo gjëra të paqena.

Lëvizja nuk ka sulmuar asnjëherë individë e gazetarë, madje as kur kanë cytur policinë për arrestime e deportime të aktivistëve tanë. Kam pritur të ndërtojmë bashkëpunim profesional, por jo me këso akuzash të paqena.