Gjykata e Durrësit ka zhvilluar ditën e sotmë seancën për masën e sigurisë ndaj Ruzhdi Tasunit.
Ai akuzohet për vrasjen e gruas së tij, Hajdie Tosunit, ngjarje kjo e ndodhur pak ditë më parë pranë biznesit të tyre.
Ndërkohë autori i krimit u shfaq i penduar në sallë dhe u kërkoi falje fëmijëve të tyre për atë që kishte bërë.
“Ishte një sherr i çastit, pas zënkave të vazhdueshme për shkak të borxheve që kishim, i kërkoj falje fëmijëve të mi. Nuk duhet të kisha mbërritur këtu”, u shpreh Ruzhdi Tasuni.
Në sallë prokurorja Teuta Rrudha ka zbuluar të tjera detaje.
“Në vendngjarje, oficerët e policisë gjyqësore e gjetën qepenin e mbyllur dhe Hajdie Tasunit, iu konstatuan 6 goditje në kokë, të cilat i kanë shkaktuar vdekjen e menjëhershme, ndërsa ka qenë vetë ai që ka njoftuar sallën operative të policisë, pas aktit të kryer në drejtim të bashkëshortes”, u shpreh organi i akuzës gjatë seancës së sotme.
Ndërkohë avokati mbrojtës i të pandehurit, ka pretenduar se klienti e ka kryer aktin e rëndë në kushtet e rëndesës psikologjike, fakt ky që sipas tij është provuar dhe nga ekzaminimet psikike të tij.
Pasi Gjykata e Durrësit ka dëgjuar të dyja palët, ka vendosur masën e sigurisë “Arrest me burg”.
