E frikshme/ Shkon për të bërë hundën por fsheh shenjat e koronavirusit, infekton mjekët

Një ngjarje e rëndë ka ndodhur në Itali në kuadër të situatës së krijuar tashmë atje nga koronavirusi, si vatra më e prekur në Europë.

Mësohet se një i ri fshehu simptomat e koronavirusit vetëm që operacioni i tij plastik në hundë të mos shtyhej.

Djali ishte infektuar dhe  jua kishte fshehur këtë fakt mjekëve të spitalit “Parini” në Aosta, veri të Italisë.

Ai kishte hyrë në operacion dhe mjeku anestezist vuri re një ngritje të temperaturës së pacientit.

Pasi doli nga salla e operacionit dhe iu bë tamponi, ai rezultoi pozitiv me COVID 19.

Por për fat të keq ai infektoi mjekun anestezist, kirurgun dhe një infermiere.

Sipas ‘La Repubblica Torino’, prokuroria e Aosta-s ka hapur zyrtarisht një dosje për të riun, i cili rrezikon deri në 12 vjet burg.

“Pacienti duhej të kryente një rinosettoplastica, një operacion estetik në hundë, i cili edhe mund të priste nuk ishte rast urgjent për t’u bërë, mund të shtyhej”- ka thënë mjeku kirurg për mediat italiane.

Javët e fundit, personi i infektuar kishte rënë në kontakt me shumë turistë që kishin ardhur nga Lombardia në zonën turistike të ‘Valle d’Aosta’ nga ku dhe mund ta ketë marrë COVID-19.