Taulant Muka, ish-Zv.ministri dhe mjeku epidemiolog, në një lidhje me “Skype” nga Zvicra për A2 bëri me dije se në Shqipëri është mjaft e vështirë të bësh vlerësime mbi situatën nga virusi vdekjeprurës, pasi sipas tij, numri i testimeve është shumë i ulët.
“Është e vërtetë që karantina duhet të kishte dhënë efekt dy apo tre javë më pas. Është e vështirë të bësh vlerësimin për Shqipërinë, pasi numri i testeve është shumë i ulët. Çdo model matematikor do të dështonte në Shqipëri me këto shifra, pasi nuk janë realiste”, tha Muka.
Më tej, mjeku epidemiolog thekson se COVID-19 në Shqipëri mund të jetë përhapur më herët se marrja e masave, rreth fundit të shkurtit dhe këtë ai e bazon te koha kur kanë ndërruar jetë personat e parë të prekur nga koronavirusi.
“Nga ana statistikore, një person nga momenti që infektohet deri kur ndërron jetë është diku te 31 ditë dhe duke u bazuar në datat kur kanë vdekur këta persona, i bie që ata janë infektuar nga fundi i shkurtit. Numrat para karantinës mund të kenë qenë më shumë se 1 mijë dhe është shumë e vështirë të bësh projeksion”, problem ky jo vetëm i Shqipërisë, por edhe i disa shteteve të mëdha përfundon fjalën e tij Muka.
