Covid-19/ Mjekja shqiptare që shkoi në Itali: Jam caktuar në zonën më të prekur, mezi po pres që të filloj

Anestezistja Alma Neco është pjesë e ekipit mjekësor që u nis drejt Italisë, për t’i ardhur në ndihmë për shkak të situatës së koronavirusit. Ajo deklaroi se nuk ka frikë sepse rrezikun e ka marrë përsipër që kur ka vendosur që të trajnohet për këtë profesion.

E pyetur për arsyen se përse iku në Itali, Neco tha se e ndjente si një detyrim, pasi ajo kishte lindur në këtë vend dhe prej vitesh ka jetuar atje.

Edhe pse ajo është caktuar në një spital në Brescia, e cila regjistron numrin më të madh të të infektuarve dhe viktimave të shënuara nga COVID-19, Alma thotë se nuk ka frikë. Gjithashtu ajo është shprehur më tej se edhe në Shqipëri nuk mungon rreziku, dhe se në këtë aspekt nuk ndryshon asgjë.

“Të gjithë kemi një lidhje me Italinë. Unë në Itali kam lindur dhe jam rritur, dhe e ndjeja si një detyrim. Rreziku ekziston, por ne e kemi marrë përsipër rrezikun që në momentin që kemi marrë përsipër këtë profesion. Edhe në Shqipëri kishte rrezik, kështu që nuk ndryshon ndonjë gjë në këtë aspekt. Prindërit më kanë mbështetur maksimalisht. Më kanë caktuar në Brescia, në spitalin me më të prekurit në Lombardi, dhe me më të infektuarit në Itali. Përsëri kjo nuk është ndonjë ndryshim, pasi ne anestezistët jemi mësuar me vrull. Madje mezi po pres që të fillojmë”, ka deklaruar ajo për Top Channel.