Bëri testin pas takimit me të prekur nga koronavirusi, del përgjigja e analizave të Donald Trump

Edhe presidenti i SHBA Donald Trump i është nënshtruar testit për koronavirusin.

Shtëpia e Bardhë bën me dije se përgjigja e analizave ka dalë negative, pra Trump nuk është i infektuar.

Testi u vendos të bëhej pas lajmeve se Trump ishte i ekspozuar ndaj COVID-19.

Vetë lajmin se kishte bërë testin presidenti e dha të shtunën paradite gjatë një konference për shtyp, ku u njoftuan të dhënat e pandemisë në vend dhe shpallja e emergjencës kombëtare.

Më pas Trump i habiti të gjithë kur shtrëngoi duart me një numër drejtuesish në kundërshtim me rekomandimet e herëpashershme të zyrtarëve të shëndetit publik, sidomos pas njoftimeve se ai vetë ishte ekspozuar ndaj virusit.

Gjithashtu mbrëmjen e djeshme u zbulua se katër anëtarë të një delegacioni brazilian që darkuan me Donald Trump fundjavën e kaluar në Mar-A-Lago kanë rezultuar të gjithë pozitivë me koronavirus.