Kryeministri i Kosovës, Albin Kurti, ka reaguar me anë të një statusi në lidhje me heqjen e taksës dhe veprimit që po merr Serbia me intensifikim të fushatës së çnjohjeve së pavarësisë së Kosovës.
Kurti i bën thirrje Serbisë që të ndalë këtë ofensivë, e po kështu që të heqë dorë nga politikat destruktive ndaj Kosovës dhe shtetësisë së saj.
Më tej ai i’u drejtohet edhe faktorit ndërkombëtarë, SHBA dhe BE që të shtojnë trysninë mbi Serbinë, e të ndërpresë politikën armiqësore ndaj Kosovës dhe që s’mund të lejojë që ky vullnet i Kosovës të nëpërkëmbet.
Statusi i kryeministrit Kurti:
Vullnetit tim të mirë, për heqjen e pjesshme të tarifës në lëndën e parë që importohet nga Serbia, në mënyrë që të krijohen kushtet për rifillim të dialogut dhe të ndërtimit të marrëdhënieve konstruktive të bashkëpunimit, qeveria serbe po i përgjigjet me intensifikim të fushatës së çnjohjeve së pavarësisë së Kosovës.
I bëj thirrje Serbisë zyrtare që ta ndalë këtë ofensivë dhe të heqë dorë nga politikat destruktive ndaj Kosovës dhe shtetësisë së saj. Po ashtu, do të kërkoj nga faktorët relevantë ndërkombëtarë, në radhë të parë ShBA-të dhe BE-ja, si ndërmjetësues në procesin e dialogut, ta shtojnë trysninë mbi Serbinë që ta ndërpresë politikën armiqësore ndaj Kosovës.
Ne kemi treguar qartë se e kemi vullnetin për marrëdhënie korrekte e normale me Serbinë. Mirëpo nuk mund të lejojmë që ky vullnet i yni të nëpërkëmbet.
Si kryeministër i Kosovës do të shqyrtoj me kujdes situatën e krijuar dhe do të veproj konform interesave të Republikës dhe qytetarëve të saj.
