LIGJET E BIZNESIT
Ministrja e Drejtësisë Etilda Gjonaj ka qenë e pranishme ditën e sotme në konferencën mbi “Sfidat e Prokurorisë së Përgjithshme në Dritën e Reformës në Drejtësi” , ku ka mbajtur dhe një fjalim.
Ajo u shpreh se në lajmin pozitiv të Komisionit Europian për Shqipërinë, ku rekomandohej hapja e negociatave, rol të rëndësishëm ka dhe reforma në drejtësi.
“Integrimi europian është një aspiratë e shqiptarëve, një ëndërr e papërmbushur. Është detyrë e gjithë institucioneve të drejtësisë. Është sfida jonë e përbashkët për të bashkërenduar veprimet tona, për të siguruar rezultate të prekshme. Reforma në drejtësi ka sjellë një kontribut në reformimin e drejtësisë penale. Ndryshimet ligjore i dhanë rol të ri prokurorisë duke garantuar pavarësi të plotë në hetim. Forcimi i pavarësisë duhet të shoqërohet edhe me konsolidimin e mekanizmave institucionalë që ndëshkojnë cdo lloj fryme të korrupsionit”, tha Gjonaj.
Menjëherë pas këtyre fjalëve, ka reaguar edhe zëdhënësi i Presidentit Tedi Blushi, i cili sulmon ministren duke thënë se është e provuar tashmë nga shkresat zyrtare që akuzohet për 4 vepra penale.
REAGIMI I PLOTE I ZEDHENESIT TEDI BLUSHI
Tallja me Reformën në Drejtësi dhe bërja e ligjeve puçiste anti-kushtetuese pati meritë të madhe për të mbledhur kaq shumë shqiptarë kundër grushtit të shtetit, ku Ministrja e Drejtësisë, siç është provuar nga shkresat zyrtare, akuzohet për 4 vepra penale.
Ndërsa të gjithë prisnin që Prokuroria të vepronte ndaj saj, sot e shohin si pjesë të frontit të Ramaformës në konferencën e Prokurorisë duke qenë edhe krenare! Pandëshkueshmëria, Padrejtësia dhe Pafytyrësia kanë arritur majat! Herën tjetër do mblidhen shumë herë më shumë se dje, shqiptarë të ndershëm dhe me dinjitet, që s’mund të pranojnë këtë Kryemaskaradë! TURP! SHAME ON YOU!
