A ka rrezik për familjarët pacienti i shëruar nga koronavirusi që la sot spitalin? Mjeku infeksionist tregon se çfarë ndodh më pas

Mjeku infeksionist, Tritan Kalo, i ftuar në emisionin “Kjo Javë” në News24, ka dhënë disa detaje për pacientin e shëruar nga COVID-19, që sot la ambientet e spitalit.

Mjeku Tritan Kalo theksoi se shërimi i pacientit ishte një moment që la mbresa në mendjen e një mjeku, që fillon e ngjall shpresa, një kënaqësi e pamatë e të gjithë stafit.

Pjesë nga intervista:

Si ishte momenti i daljes së pacientit?
Tritan Kalo: Lë mbresa në mendjen e një mjeku, që fillon e ngjall shpresa. Është kënaqësi e pamatë e të gjithë stafit, që ka një traditë të punës si një ekip i vetëm, sepse është ky çelësi i suksesit. Kjo tregon atë që merituam në 2013, që të shpallemi si ekipi më i mirë në Shqipëri i trajtimit infektiv.

Si ishte rrugëtimi për këtë rast?
Tritan Kalo: Jo të gjithë të shtruarit kanë simptoma të njëjta, por mund të shfaqin veprime nga më të papriturat dhe të ndryshme nga dita në ditë. I sëmuri dhe ata që po përgatiten për të dalë kanë pas ndryshim të pritshëm për të dalë, brenda evolucionit. Që në momentin e shtrimit, pati një ecuri tejet të mirë, ndaj sot doli nga spitali, me dy tampon të bërë, që rezultuan negativë. E këshilluam të mbetet edhe 14 ditë në mjediset familjare, sepse kështu këshillohet.

A ka rrezik për familjarët ai?
Tritan Kalo: Distancimi duhet zbatuar edhe 14 ditë për të vetmin dyshim që kanë mjekët që edhe pse mund të jetë negative ka raste, që një virus i mushkërisë mund të ketë shpëtuar. Duhen së paku 27 ditë që të zhduket gjithcka dhe që individi të mos ketë më rrezik dhe mundësia e kthimit të virusit të bëhet thuajse zero. Mund të gjendet një dritare e vogël dhe ta rikthejë sërish virusin. Ndaj këshillohet periudha 14 ditore pas daljes nga spitali.

Çfarë simptomash kishte pacienti?
Tritan Kalo: Ai është trajtuar me medikamente, që duhen diskutuar mes personelit mjekësor. Ne nuk bëjmë asgjë, nëse nuk kemi një konsultim paraprak mes nesh. Ky i sëmurë nuk ka pasur kurbën e famshme të temperaturës, pra nuk ka pasur temperaturë të lartë, ndërsa ka të tjerë që vijnë me temperaturë të lartë. Por janë dy fakte të rëndësishme të COVID-19: kontakti, dhe tjetra përvec temperaturës, është rëndimi i frymëmarrjes.