Mijëra kafshë shtëpiake në qytetin e Wuhanit në Kinë, thuhet se janë bllokuar brenda shtëpive dhe janë në rrezik të vdesin nga uria në mungesë të pronarëve të tyre, të cilëve nuk u është lejuar të kthehen në qytet pas përhapjes së coronavirusit, deklarojnë organizata që mbrojnë kafshët.
Qyteti Wuhan, ku u zbulua për herë të parë virusi, është izoluar që nga 23 janari në vazhdën e epidemisë dhe shumë banorë kanë braktisur këtë qytet për disa vende të tjera për festimet e Vitit të Ri Kinez.
Virusi vdekjeprurës ka marrë jetën e 304 personave në Kinë deri më tani, me rreth 14.411 raste të raportuara në vend dhe 146 raste të konfirmuara në 23 vende jashtë Kinës, sipas raportit të fundit të dielën nga Organizata Botërore e Shëndetit, e cila zyrtarisht deklaroi virusin, emergjencë globale të shëndetit publik.
Diku 50,000 kafshë shtëpiake janë raportuar të jenë braktisur në shtëpitë e tyre, bazuar në numrin e banorëve që janë larguar nga qyteti, raporton Reuters.
Disa pronarë të kafshëve shtëpiake, të cilët kanë qenë të karantinuar ose të bllokuar në një pjesë tjetër të vendit pas shpërthimit, kanë thënë se po kontaktonin me Lao Mao një banor të Wuhanit, dhe të tjerët në rrjetet sociale për të ndihmuar kafshët e tyre.
