Vulin: Çështjen e Kosovës nuk mund ta zgjidhë Grenell, por vetë shqiptarët dhe serbët

Ministri i Mbrojtjes Alekander Vulin ka thënë se i dërguari i posaçëm i presidentit amerikan për bisedimet Kosovë-Serbi, Richard Grenell nuk do të jetë në gjendje të zgjidhë çështjen e Kosovës, duke potencuar se, këtë mund ta bëjnë vetëm serbët dhe shqiptarët.

“Nuk mund ta zgjidh ai dhe askush tjetër. Çështja e Kosovës mund të zgjidhet nga populli serb dhe shqiptar. Vetëm popujt mund ta bëjnë këtë”, tha Vulin.

Ministri serb i Mbrojtjes, duke folur për mediat serb, ka thënë se SHBA-të dëshirojnë të tregojë se  janë më të përgatitura se BE dhe se se mund të zgjidhin probleme të cilat BE nuk mund t’i zgjidhë, për çka, siç thotë ai, fajtore kryesore është BE.

“Marrëveshja e Brukselit, e cila është nënshkruar me ndërmjetësimin e BE-së nuk është respektuar dhe askush nuk është fajtor dhe nuk është përgjegjës për këtë. Pas kësaj, është e vështirë të kesh besueshmërinë e një negociatori të suksesshëm”, thotë ministri serb.

Ai më tej thotë se BE e ka humbur autoritetin dhe ndikimin e saj  dhe amerikanët tani po përdorin këtë hapësirë.

“Shqiptarët vlerësojnë vetëm fuqinë, kjo është arsyeja pse ata sillen me përbuzje dhe mospërfillje ndaj BE-së. Nuk i ndëshkuan ata dhe tani ata po e kthejnë atë”, tha Vulin.