Ditën e sotme Partia Demokratike ka komentuar aksionin që ka ndërmarrë ditën e fundit Operacioni Forca e Ligjit për goditjen e krimit të organizuar.
Nëpërmjet ish-deputetit Flamur Noka, i cili ka dalë në një deklaratë, kjo forcë politike është shprehur se në vend të shoët qesharak dhe turizmit policor, mund të bëhej shumë punë me trafikantët e drogës që janë miq dhe ortakë në biznes me vëllain e kryeministrit Edi Rama, Olsin.
Noka deklaroi gjatë fjalës së tij se nga ky ky operacion nuk mund të mbeten të paprekura pasuritë e Ermal Hoxhës, nipit të diktatorit Enver Hoxha, i dënuar për laboratorin e drogës në Xibrakë.
“Pasuritë e Ermal Hoxhës, bashkëpunëtorit të Olsi Ramës për ngritjen e laboratorit të kokainës në Xibrakë, nuk duhet të mbeten të paprekshme.
Financieri i grupit të strukturuar kriminal, që, menjëherë pas ardhjes në pushtet të Edi Ramës, ngriti laboratorin e parë të kokainës në Shqipëri, nuk duhet të ketë mbrojtjen e Olsi Ramës nga ligji i Edi Ramës.
Fatkeqësisht, rastet si ky i Ermal Hoxhës, Saimir Tahirit apo Taulant Ballës me mikun e tij trafikant droge, që merr tendera publikë tregojnë sesa thellë e ka kriminalizuar Edi Rama politikën dhe vendimmarrjen”, u shpreh Noka.
Më pas ai shtoi se Edi Rama është i pafuqishëm për të luftuar krimin e organizuar, sepse ai është vetë krimi i organizuar.
“Shqiptarët e dinë se nuk ka asnjë shans që Edi Rama të luftojë krimin e organizuar, pasi ai është produkti politik i parave të pista të krimit të organizuar.
Gjatë gjithë karrierës se tij politike, Edi Rama ka siguruar vota dhe para prej krimit të organizuar, duke u dhënë trafikantëve të drogës leje ndërtimi, koncesione, tendera dhe pasuri publike.
Për të luftuar krimin e organizuar, Shqipëria nuk ka nevojë për ligje të reja propagandistike, që nuk zbatohen kurrë për miqtë, familjarët dhe klientët e kryeministrit. Shqipëria ka nevojë për një qeveri dhe një kryeministër që nuk është peng i krimit të organizuar”, përmbylli fjalën e tij Flamur Noka.
