Tentuan të kalonin të ëmën e Arben Bilalit me letra false, pezullohen 4 punonjësit e policisë (Emrat)

Shërbimi i Çështjeve të Brendshme dhe Ankesave ka pezulluar nga detyra punonjësen e Policisë, Matilda Bilalin. Kjo e fundit është gruaja e ish-policit të vrarë më 30 janar 2019, në zonën e Selitës. Ndërkohë, së bashku me Bilalin, janë pezulluar nga detyra dhe Liri Sinakoli, Aranit Dibra dhe Arta Mamani.

SHÇBA njofton se të 4 efektivët e Policisë, kanë tentuar të kalojnë shtetasen K.B me pasaportë të falsifikuar jashtë vendit. Ndërkaq, mësohet se K.B është e ëma e ish-policit të vrarë. Nusja e Bilalit ka kërkuar ndihmën e kolegëve për të kaluar vjehrrën drejt Anglisë, një vit pas vrasjes së të shoqit. Specialistja e Krimeve në Drejtorinë e Përgjithshme të Policisë, është pezulluar nga detyra, ndërkohë që janë ende të paqarta motivet, pse e ëma e Arben Bilalit do të shkonte me letra false në Mbretërinë e Bashkuar.

Njoftimi i plotë:

Pas një hetimi pro-aktiv të Shërbimit për Çështjet e Brendshme dhe Ankesat (SHÇBA), Tiranë, në bashkëpunim me Prokurorinë pranë Gjykatës së Shkallës së Parë, në kuadër të një procedimi penal për veprën penale “Dhënie ndihme për kalim të paligjshëm të kufirit”, me vendim të Gjykatës janë caktuar masat e pezullimit të ushtrimit të detyrës për punonjësit e Policisë:  L.S., me detyrë në DPPSH; M.B., me detyrë në DPPSH; A.M., në Komisariatin e Policisë Rinas; A.D., në Komisariatin e Policisë Rinas. U vendos masa “Detyrim për t’u paraqitur në Policinë Gjyqësore”, për shtetasen K.B. Këta punonjës në bashkëpunim me njëri-tjetrin kanë konsumuar veprën penale të “Dhënies ndihmë për kalim të paligjshëm të kufirit”, duke dashur të mundësojnë kalimin e paligjshëm të kufirit shtetëror në Aeroportin e Rinasit, të një shtetaseje shqiptare me pasaportë të falsifikuar. Hetimet vijojnë nën drejtimin e Prokurorisë së Shkallës së Parë, Tiranë. SHÇBA fton çdo qytetar të denoncojë çdo shkelje të punonjësve të Policisë në numrin falas 0800 90 90.