Ka vijuar edhe ditën e sotme aksioni i Operacionit Forca e Ligjit që u ka kërkuar formularin për deklarimin e pasurisë 2 shtetasve të tjerë nga Lezha.
Mësohet se ata janë Edmond Sufja dhe Astrit Limani, të dy të dënuar për trafik lëndësh narkotike.
Kështu, ata duhet të deklarojnë pasuritë e tyre brenda 48 orëve me shkrim.
Por Astrit Limani, nuk është një emër i panjohur për drejtësinë.
Ai u arrestua më 10 maj të vitit të kaluar pasi është dënuar nga Gjykata e Milanos me 13 vite burg për trafik ndërkombëtar në droge. 48-vjeçari njihet nga të gjithë si “Titi i Ukës” të cilit në vitin 2015 iu sekuestrua një pasuri me vlerë 10 milionë euro me vendim të Gjykatës së Lezhës. Siç thuhej atëherë në deklaratat zyrtare të policisë e Prokurorisë, në total tre pallate me 230 apartamente banimi dhe një hotel.
NJOFTIMI ZYRTAR I POLICISE
Vijon operacioni Forca e Ligjit, në bashkëpunim me strukturat vendore të Policisë, në zbatim të detyrave të përcaktuara në Aktin Normativ të datës 31 janar 2020, për dërgimin e kërkesave për vetëdeklarim të pasurisë, personave që janë subjekt i këtij ligji. Në këtë kuadër, OFL u ka dërguar kërkesat për vetëdeklarim të pasurisë, shtetasve: E. S dhe A. L, banues në Lezhë, të dënuar për trafikim të lëndëve narkotike. Brenda 48 orësh, këta individë, si subjekt i Ligjit Special, duhet t’u përgjigjen me shkrim të gjitha pyetjeve të OFL-së.
Më pas, përgjigjet e marra do t’i dërgohen SPAK-ut, për veprime të mëtejshme. Me qëllim evidentimin dhe dërgimin në SPAK, të të gjithë personave që janë subjekt i Ligjit Special, OFL është në veprim të pandërprerë dhe në kryerje të veprimeve komplekse. Për të gjitha nismat procedurale dhe operacionet ekzekutive që do të kryejë, OFL do të informojë publikun në vijimësi.
