Arten Ibrahimi është doganieri 36-vjeçar i cili u vu në pranga pasi u kap me 33 pako me lëndë narkotike dhe me pistoletë të tipit TT në pikën kufitare të Qafë Botës. Doganieri u shkarkua nga detyra ndërsa u kap bashkë me 23-vjeçaren Kostandina Meci, pasi e kishin fshehur lëndën narkotike në makinë.
Vendimi për shkarkimin e tij është marrë nga drejtori i përgjithshëm i doganave Gjon Bardhi.
Njoftimi i plotë:
Shkarkohet nga detyra doganieri që u kap me lëndë narkotike. Drejtori i Përgjithshëm i Doganave, Gjon Bardhi, ka reaguar duke i zgjidhur menjëherë marrëdhëniet e punës shtetasit Arten Ibrahimi, me detyrë doganier peshore/Pikë Kontrolli, Zyra e Operacioneve Doganore, Dega Doganore Tre Urat.
Zgjidhja e marrëdhënieve të punës me shtetasin në fjalë u bë pas ndalimit nga Policia të tij në Pikën Kufitare të Qafë Botës, ku në mjetin që ai drejtonte u gjet lëndë narkotike.
Për vetë përgjegjësitë veçanta që ka Dogana Shqiptare konsiderohet shkelje shumë e rëndë kur nga vetë punonjësit e ADSH shkelen ligjet që rregullojnë punën e Doganave Shqiptare, ose që kanë lidhje me të dhe për të cilat janë ngarkuar ti zbatojnë.
Në këto kushte, posedimi i lëndëve narkotike përbën shkelje shumë të rëndë të disiplinës në punë, duke ulur imazhin dhe integritetin e ADSH, cenuar misionin e Doganës në arritjen e standardeve më të larta të etikës në fitimin e besimit të publikut.
