Po vjen drejt Shqipërisë, stuhia “Ciara” godet Italinë

Stuhia “Ciara”, ka goditur Evropën Qendrore dhe Perëndimore gjatë fundjavës, po prek gjithashtu Sardenjën dhe rajonet e Italisë Qendrore. Parashikimet tregojnë për shpërthime të forta stuhie mbi Sardenjën, Marche, Abruzzo dhe Molise.

Corriere della Sera raporton se mbrëmjen e sotme në Korsikë, era pritet të arrijë shpejtësinë rreth 200 kilometra në orë. Stuhia Ciara, e cila në Gjermani u quajt Sabine, shkaktoi ndërprerjen e trageteve të dielën në La Manch, të cilat rifillouan të hënën në mëngjes.

Në Francë, 42 departamente u vunë në alarm dhe 130 mijë shtëpi mbetën pa energji elektrike për shkak të rënies së linjave. Rreth pesëdhjetë fluturime ishin anuluar në aeroportin e Paris Charles De Gaulle, 150 të tjera në Këln dhe Dyseldorf. Treni me shpejtësi të lartë Amsterdam-Berlin është i bllokuar për shkak të një peme të rënë në shinat.

Në Ishujt Britanikë, “Ciara” regjistroi erëra deri në 150 km/orë në Uells dhe 62,000 shtëpi mbetën në errësirë, 10,000 të tjera në Irlandë. Ndërsa një 58-vjeçar vdiq pas rrëzimit të një peme mbi makinën e tij.

Paralajmërim maksimal u dha gjithashtu në Belgjikë dhe Holandë, 240 fluturime u anuluan në aeroportin e Amsterdamit. Era ishte aq e fortë nga Perëndimi saqë shkatërroi rekordin e shpejtësisë në fluturimit midis Nju Jorkut dhe Londrës, i cili u realizua në 4 orë e 56 minuta.