PD bën kallëzim në SPAK/ Akuza për 10 persona, mes tyre Manastirliu, Beqaj dhe Vilma Nushi

Ditën e sotme Partia Demokratike ka dorëzuar kallëzimin penal për koncensionin e Check Up-it në Prokurorinë e Posaçme Antikorrupsion, SPAK.

PD ka kallëzuar të paktën 10 persona mes të cilëve ish-ministrin e Shëndetësisë, Ilir Beqaj, Ministren aktuale të Shëndetësisë, Ogerta Manstirliu dhe aksioneren e kompanisë përfituese të check up-it, Vilma Nushi, duke e konsideruar Check Up-in si një nga vendimet më korruptive të qeverisë Rama.

PD i ngarkon me 7 akuza, që nga korrupsioni aktiv dhe pasiv, shpërdorimi i detyrës deri tek përfitimi i paligjshëm.

Sipas PD, kallëzimi penal ka analizuar me prova dhe fakte shkeljen e ligjit, në dy faza, në procedurën e dhënies në koncesion dhe përzgjedhjes së fituesit, si dhe në periudhën e zbatimit të kontratës.

Partia Demokratike thekson se të gjitha shkeljet e kryera kanë sjellë dëm ekonomik për Buxhetin e Shtetit, dhe se është provuar shkelje e barazisë në tëndera, si dhe cënimin e interesit publik, duke pasur parasysh cilësinë e shërbimit dhe marrëdhënien financiare ndërmjet fituesit dhe Fondit të Sigurimeve Shëndetësore.