Së fundmi një letër e pazakontë i është drejtuar Këshillit të Lartë të Prokurorisë.
Nuk bëhet fjalë për kërkesë në lidhje me drejtësinë apo cështje të politikës.
Në postën e kreut të KLP, Gentian Ibrahimi ka mbërritur një letër nga Tartar Bazaj, anëtar i këtij institucioni.
Letra është nisur më 24 janar të këtij viti.
Lajmin e bën me dije ish-ministri i Drejtësisë Ylli Manjani, ku Bazaj i qahet drejtuesit të KLP sepse nuk ka marrë kartolinën e Vitit të Ri, sikur te qe ky ndonjë problem shumë i madh.
I shqetësuar për atë që ka ndodhur, këto janë dy pyetjet që Bazaj ngre (me të drejtë ose jo):
: 1-Nëse në adresën time pranë Këshillit të Lartë të Prokurorisë ka ardhur ndonjë kartolinë Urimi për Vitin e Ri 2020 ose jo?
2-Dhe nëse po, kanë mbetur rastësisht pa u ndarë apo cilat janë arsyet e mos dorëzimit të tyre tek personi im?
Ndër të tjera ai nuk beson që kartolina mos jetë dorëzuar nga palët e treta, megjithatë këmbëngul të dije se si ka shkuar puna.
“Gjatë ditëve të janarit 2020 jam informuar nga drejtues institucionesh që në adresën time janë nisur kartolina të ndryshme Urimi për Vitin e Rei 2020. Këto ashtu sikurse janë nisur për të gjithë anëtarët e Këshilit të Lartë të Prokurorisë. Ajo që mua më ka bërë përshtypje është se disa nga kolegët që kam pyetur, më kanë konfirmuar një gjë të tillë, ndërsa për mua çuditërisht mua nuk më është vënë në dispozicion asnjë kartolinë. Për sa më sipër edhe pse nuk do ta besoja kurrë që ndonjë person i caktuar të bjerë në nivel kaq të ulët sa të më mbahen edhe kartolinat e urimit, por gjithësesi do të doja të kisha informacion,”-shkruhet ndër të tjera në letër.
