Miratohen ndryshimet në statutin e partisë, ka çfarë u vendos te Kongresi i PS

Ditën e sotme, në Kongresin e Partisë Socialiste janë miratuar ndryshimet në statutin e partisë ndërsa mocioni i dërguar nga 8 socialistët nuk është marrë parasysh.

Gjithashtu, në sesionin e dytë, u lexua kërkesa për mocion nga 8 socialistët mes tyre Arta Dade, Maqo Lakrori etj.

Sipas Arben Pëllumbit, kërkesa e 8 anëtarëve të Partisë Socialiste nuk ishte dorëzuar sipas rregullave.

Në sesionin e dytë u miratuan ndryshimet teknike në statutin e PS. U vendos krijimi i Librit të Rregullave që përmbledh rregulloret e organeve të partisë, kodin e zgjedhjeve, kodin e etikës, çdo udhëzim për funksionimin e institucioneve të PS.

U fut në statut koncepti i bashkëdrejtimit burrë-grua.

Vendoset kontrolli i integritetit dhe figurës, bazuar në legjislacion. U sanksionua se kush nuk reflekton të vërtetën, kush nuk tregohet i sinqerte për aktivitetin e tij, merr përsipër sanksionet jo vetëm në aspektin e  përgjegjësisë ndaj ligjit, por edhe me përjashtimin nga partia.