Meta: Gjonaj është falsifikatore, të shkojë e të tregojë shokët në SPAK

Pas deklaratës për mediat të Ministres Gjonajt, ka reaguar edhe presidenti Ilir Meta.
I ftuar në emisionin “Opinion” ai tha se nuk merret me një falsifikatore. Kreu i Shtetit akuzoi edhe njëherë ministren se ka falsifikuar, duke i marrë kompetencën atij dhe Këshillit të Emërimeve në Drejtësi.

“Si mund të merrem unë me një falsifikatore? Gjuha ime ka qenë shumë korrekte, ajo më ngatërron mua me gjuhën e Monikës, ata ta zgjidhin bashkë të dyja. Zonja të shkojë e të tregojë shokët te SPAK. Nuk ka Shqipëria institucion më të rëndësishëm se Gjykata Kushtetuese dhe Gjykata Kushtetuese, me këto filma që bën Dvorani dhe kjo zonja, e bën këtë Kushtetutë një letër pa vlerë. Presidenti i ka kapur në flagrancë, jo për meritë të Presidentit, se Presidenti i ka paralajmëruar që prej dy vitesh. I kamë thënë që te Gjykata Kushtetuese është vija e kuqe. Ky është krimi më i rëndë dhe më i thjeshtë për t’u hetuar se janë 3 letra dhe 8 veta për t’u pyetur. Ajo ka falsifikuar, më ka rrëmbyer mua kompetencën, ja ka rrëmbyer kompetencën KED-së. Nuk merrem unë me reagimet e saj. Ministren e ka “vrarë” që e ka porositur për të bërë këtë akt kriminal. E ka porositur ai që nuk e lejon të japë dorëheqjen”, tha Meta.