Gjykata e Tiranës ka pushuar çështjen për gjyqtaren Saida Dollani. Ndërsa, Prokuroria ka kërkuar rihapjen e çështjes. Gjyqtarja Saida Dollani ishte pjesë e trupës që shqyrton dosje “Shullazi”, dhe është larguar si pasojë e kërcënimeve të marra.
Ndërkaq, zbardhet dëshmia e bashkëshortit të Dollanit. Pas kërcënimit të bashkëshortit të gjyqtares, u vu në lëvizje policia dhe nisën hetimet asokohe. Ndërkohë që Prokuroria kryente hetimet, në procesin ndaj Shullazit regjistroheshin debate të forta mes të dyshuarve dhe gjyqtares. Mësohet se të dyshuarit e akuzonin gjyqtaren Dollani se me çështjen e tyre po kalonte vettingun.
Sakaq, bashkëshorti ka thënë se një djalë i ri e ka kërcënuar duke i futur pistoletën në gojë si dhe i ka përmendur djemtë në Francë.
“Isha në lokalin e lagjes bashkë me një mikun tim. Një moment dola të pija një cigare të dera e jashtme. Aty pranë kaloi bashkëshortja ime me një shoqen e saj dhe vajzën. Pak minuta më pas, në të djathtën time erdhi një djalë i rri, rreth 20-22 vjeç, i cili ishte veshur me bluzë ngjyrë si në të zezë, pantallona të errëta dhe atlete të bardha.
Ai erdhi direkt me pistoletë në dorë dhe vuri këmbën e majtë pas këmbës sime të djathtë. Më rrëzoi në tokë dhe më drejtoi pistoletën në gojë. Mu drejtua me fjalët ‘ti me atë tët shoqe mos harro se ke dy fëmijët në Francë’.
Në këtë moment ndërhyri shoku im, i cili e kapi nga pas personin. Ai u largua nga pjesa e djathtë e rrugës, ku e mori një automjet i bardhë, që drejtohej nga një person me mjekër. Kërcënimi në drejtimin tim ka ndodhur për shkak të funksionit të bashkëshortes time si gjyqtare në gjykatën e Apelit për Krime të rënda”, kjo është dëshmia që ka dhënë bashkëshorti i gjyqtares dhënë në prillin e 2019.
Asokohe gjyqtarja kishte në shqyrtim dosjen ndaj Emiljano Shullazit dhe bandës së tij, të akuzuar për gjobëvënie në kuadër të grupit të strukturuar kriminal.
