Saimir Taullai, i cili ka plotësuar formularin për deklarimin e pasurisë të kërkuar në kuadër të Operacionit Forca e Ligjit, deklaroi se ai çdo gjë e ka me dokumente, është taksapagues i rregullt dhe nuk e kupton se përse ndaj personit të tij, po bëhet një shou i tillë.
“Më vjen një telefonatë nga Lushnja, ishte policia e Lushnjës dhe më thotë që të marrim për të verifikuar makinën. U thashë që nuk ka problem se po vij unë. U ktheva direkt aty pa mbaruar punët e mia.
Më sekuestruan fuoristardën e më thanë se ishte urdhër nga Tirana. Nuk ishte operacioni i OFL-së. Sa vajta aty më thanë të plotësoja këtë formular. Makina është blerë para 1.5 vite më parë 3 mln lekë të vjetra. Makinë e vitit 2004.
Makinë e blinduar? Jo mor vlla, nuk ka lodhje makinë e blinduar. Nuk e kuptoj kush po ma bën këtë gjë. Më vjen zor të iki në shtëpi, më vjen zor nga kalamajtë. Policia të bëjë punën e saj, por çfarë është ky shou. Makinë e blinduar, çfarë nuk pon thonë. Plotësova formularin e OFL-së në komisariat. Pastaj prita dy orë përfaqësues nga Tirana të OFL-së. Pastaj takova avokatin.
Nuk jam kundër ligjit, rregullave. Më vjen zor, përse i bën këto gjëra shteti. Unë i kam të gjitha me dokumente pronat e mia. Edhe një pronë që e kemi shitur 3.5 milionë euro.
Jam i hapur, të kontrollohem. Nuk ka njeri mbi ligjin. Pse ma bëjnë shou këtë. Thonë që kam makinë të blinduar, kur unë nuk e kam.”, tha ai në Shijak TV. Në lidhje me konfliktin me bandën e Aldo Barres ai tha se “nuk ka lidhje me njeri se çfarë bëhet në Lushnjë. Vëllai im u vra në vend në 2005-ën. Ka qenë biznesmen.”
Ai i bëri një thirrje shtetit: “Jam i hapur për çdo gjë. Vetëm policia të na lërë rehat”. Në vitin 2017, Taullai i shpëtoi një atentati, ku u plagos me një plumb. Ai njihet si biznesmen në Lushnje dhe aktivitetin e tij e ka zgjeruar edhe në Greqi e Itali. Familja Taullai njihet si rivale e fortë e Aldo Bares. Në vitin 2005, Baki Taullai u vra, ndërkohë që Saimiri, vëllai i tij, dëshmoi në gjyq, se autorë të vrasjes, ishin pjesëtarët e këtij grupi me urdhër të Bares.
