LIGJET E BIZNESIT
Gazetari investigativ Artan Hoxha ka folur mbrëmjen e djeshme për një kasetë, në të cilën Enver Stafuka tregonte për 31 vrasje me pagesë, të kryera në Tiranë, bashkë me autorët dhe porositësit.
“Kam dhe një rast tjetër që jam duke e gjurmuar nuk e di sa sukses mund të kemi. Dyshimet janë që personi i cili ka deklaruar para se të ekzekutohej, se e kane torturuar keq është një person që është rrëmbyer. Kemi bërë dhe ne emision. E kanë rrëmbyer banditë të veshur si forca speciale (Enver Stafuka).
Dhe para se ta vrisnin e kanë torturuar dhe e kanë filmuar. Unë nuk e di dhe ishalla uroj që të jetë ajo kasetë në qarkullim, ai ka treguar 31 vrasje. Ai është vrasës me pagesë. Aty ku ka qenë vetë dhe kjo prandaj e kanë torturuar. Tek ai regjistrim dalin dhe vrasje shumë të bujshme në Tiranë që ne nuk i kemi…”, tregoi Hoxha në studion e programit “Opinion”.
Kujtojmë se Enver Stafuka u rrëmbye afërsisht 5 vitë më parë në qendër të Fushë-Krujës, nga 4 persona të veshur me uniforma të Forcave Speciale.
Stafuka u dyshua për vjedhjen e automjetit me të cilin u krye atentati ndaj kryekomisarit Dritan Lamaj.
Ishte vëllai i të rrëmbyerit personi që bëri fillimisht denoncimin në policinë e Fushë-Krujës.
Familjarët dëshmuan asokohe se Enveri po pinte kafe në një lokal përballë biznesit të familjes, dhe në ato momente 4 personat e veshur me jelekë policie dhe të armatosur, iu afruan dhe nën kërcënimin e armëve e futën me forcë në një makinë.
Ende nuk dihet asgjë dhe sot e kësaj dite për fatin e Enver Stafukës.
