Emergjencë kombëtare në Somali, shikoni se si është pushtuar vendi nga karkalecat (VIDEO)

Në një kohë që bota, kryesisht Kina është pushtuar nga frika e koronavirusit, mesa duket një tjetër situatë emergjente paraqitet në Afrikë, konkretisht në Somali.

Ministria e Bujqësisë vendase ka njoftuar se vendi tashmë është ‘pushtuar’ në mënyrë të frikshme nga karkalecat, të cilët konsumojnë sasi të mëdha të bimëve dhe përbëjnë një kërcënim të madh për sigurinë e brishtë të gjendjes së ushqimit në Somali.

Kjo situatë nuk ndodhte që prej 25 vjetësh sipas asaj që raportojnë Kombet e Bashkuara.

Të gjendur në këtë situatë, autoritetet në Somali kanë shpallur emergjencën kombëtare dhe druhen se situata mund të dalë jashtë kontrollit përpara se të vijë prilli, kohë në të të cilën fillojnë dhe të korrat.