Policia e Shtetit ka arrestuar një 27-vjeçar, i cili rezulton se ka kryer 8 grabitje, ku 3 prej tyre janë bërë në Durrës, 4 në Tiranë dhe 1 në Elbasan.
Mësohet se personi që ka rënë në pranga është identifikuar si shtetasi Astrit Thaçi, i cili është arrestuar mbrëmjen e djeshme në zonën e Kombinatit në kryeqytet.
Mesditën e djeshme, në kërcënimin e armës ai grabiti një argjendari në qytetin e Elbasanit.
Burime zyrtare konfirmojnë se ai është dhe autori i grabitjes së filialit Kredo.al javën e shkuar në Durrës dhe autori i plagosjes së shtetasit Ramazan Terziu në tentativë për t’i vjedhur banesën.
Ai është autori i 8 grabitjeve apo tentavi grabitjesh, më konkretisht:
Në Durrës, në datën 08.02.2020, në lagjen 12, Durrës, është vjedhur me armë zjarri filiali i një banke të nivelit të dytë, ku autori mundi të merrte një shumë prej 100.000 lekësh.
-Më datë 10.02.2020, në lagjen 13, Plazh, Durrës, nën kërcënimin e pistoletës ka tentuar të vjedhë banesën e shtetasit R. T., duke e plagosur në këmbë.
-Më datë 11.02.2020, në lagjen nr. 14, Shkozet, Durrës, nën kërcënimin e armës ka vjedhur në një Big Market, nje shumë prej 100.000 lekësh dhe steka me cigare.
Po ky shtetas, më datë 12.02.2020, në rrugën “Muhamet Gjollesha” pranë Zogut të Zi, Tiranë, ka tentuar të vjedhë në një agjenci turistike.
-Me datë 12.02.2020, në rrugën “Llambi Bonat” Kombinat , Tiranë, nën kërcënimin e armës ka tentuar të vjedhë në një Big Market.
-Me datë 13.02.2020, në rrugën “Kongresi i Lushnjës”, nën kërcënimin e armës ka tentuar të vjedhë në një Big Market.
-Më datë 15.02.2020, në rrugën “Abdyl Frashëri” jashtë banesës së shtetasit R. N., e ka goditur këtë shtetas me sende të forta duke i marë një shumë prej 300 eurosh dhe një aparat celular Iphone 11 ProMax.
Në Elbasan, më datë 15.02.2020, në lagjen “Ali Pasha”, Elbasan, nën kërcënimin e pistoletës ka vjedhur në një argjendari, një sasi bizhuterish.
Policia bën me dije se në momentin e kapjes, këtij shtetasi iu gjetën dhe sekuestruan sendet e mëposhtme: -17 varëse floriri, dy ora dore floriri, 20 byzylykë floriri dhe 51.700 lekë të reja.
Materialet procedurale do t’i referohen Prokurorisë së Rrethit Gjyqësor Durrës, Tiranë dhe Elbasan, për veprën penale “Vjedhja me armë, e mbetur në tentativë”, “Plagosja e rëndë me dashje”, Vjedhja me dhunë” dhe “Vjedhja e bankave dhe arkave të kursimit”.
