Ambasadori Lu e cilësoi “peshk të madh” Arbër Çekaj habit me kërkesën në gjyq: Meqë kanë investuar në SPAK…

Është shtyrë sërish seanca e sotme e gjyqit ndaj Arbër Çekajt, Donald Lushajt dhe Armando Pezakut.

Shkak për këtë shtyrje në Gjykatën e Posacme, është bërë kërkesa e Çekajt, i cili akuzohet për trafikun e 613 kile kokainë në kontenierin e bananeve në Maminas.

Çekaj ka kërkuar që në sallë te jenë të pranishëm dhe përfaqësues të ambasadës amerikane dhe asaj gjermane.

Kohë me parë ambasadori i SHBA në Tiranë Donald Lu, e cilësoi Arbër Çekajn si ‘peshk të madh’ , ndërkohë që ai sot i është përgjigjur menjëherë duke i thënë se duhet të vijë në sallë të shohe se kush është peshk i madh e kush jo, meqë dhe së fundmi është investuar në SPAK.

“Drejtuesi i ambasadës amerikane me ka konsideruar peshk të madh, duke iu referuar të dhënave të prokurorisë. Kërkojë që e nderuara ambasadë të jetë e pranishme për të kuptuar se kush është peshk i madh dhe kush jo. Kush merret me kokainë e kush me banane. Meqë kanë investuar shumë në SPAK,”- deklaroi Çekaj sot, përpara trupës gjykuese.

Kujtojmë se seanca e kaluar u shty për shkak të mungesës së njërës prej anëtareve të trupit gjykues, Ilirjana Olldashi.