Aksioni i policisë çon në pranga babë e bir, ja çfarë iu gjet në banesë pas kontrollit (FOTO)

Policia e Durrësit ka vënë në pranga babë e bir ditën e sotme, pasi akuzohen për veprat penale “Prodhim dhe shitja e narkotikëve” dhe “Mbajtja pa leje e municioneve luftarake”.

Sipas informacioneve ata janë: Shtetasit I. Ç., 57 vjeç dhe B. Ç., 29 vjeç (babë e bir), banues në Durrës.

Fillimisht uniformat blu kanë vënë në pranga 29-vjeçarin në lagjen Nr. 1, Durrës dhe në cilësinë e provës materiale kanë sekuestruar disa doza me kokainë.

Policia njofton se pas kontrollit në banesën e babait të tij (shtetasit I. Ç.) u gjetën dhe sekuestruan në cilësinë e provës materiale: 2 automjete të tipit “Benz Ml” dhe “Volksëagen”, të cilat përdoreshin në funksion të aktivitetit, 2 peshore elektronike, 1 krehër automatiku me 17 fishekë, radio policie, 2 palë targa, si dhe një shumë parash të përfituara nga shitja e lëndës narkotike.”

Materialet i kaluan Prokurorisë së Rrethit Gjyqësor Durrës.