Vrau policin dhe të birin 8 vjeç, policia publikon foton e fierakut të shumëkërkuar (EMRI)

Ai është i dënuari me burg të përjetshëm Engjëll Brahimi.

Në datën 10 gusht 2000, në vendin e quajtur “Pishporo”, në Fier, shtetasi Engjëll Brahimi, në bashkëpunim me shtetas të tjerë, ka vrarë me armë zjarri shtetasin A. B., punonjës policie, të birin e tij 8-vjeçar, si edhe i ka plagosur nipin 10 vjeç.

Engjëll Brahimi është dënuar me burgim të përjetshëm nga Gjykata e Shkallës së Parë Fier, për veprën penale “Vrasje me paramendim, për hakmarrje”.

Policia bën të ditur se çdo ditë do të publikojë persona qe janë objekt i punës së Njësisë së Kërkimit.

Uniformat blu bëjnë thirrje se në rast se dispononi informacion mbi vendndodhjen e tyre, të njoftoni në “Komisariatin Dixhital” apo numrin falas 112, duke iu siguruar anonimat të plotë dhe reagim të menjëhershëm.