Një plagosje me armë zjarri ka ndodhur sot në orët e para të mëngjesit në Delvinë.
Mësohet se personi i plagosur është shtetasi me iniciale M.D, 48 vjeç, banues në Mirditë, dhe është qëlluar në këmbë për motive të dobëta.
Ndërkohë policia ka arrestuar autorin, shtetasin me iniciale K.N, 73 vjeç, dhe ka sekuestruar gjithashtu dhe armën me të cilën është kryer plagosja.
NJOFTIMI ZYRTAR I POLICISE
Në orën 04:00, të mëngjesit të sotëm, në fshatin Kopaçëz, Delvinë, për motive të dobëta shtetasi K.N ka plagosur në këmbë me armë zjarri shtetasin M.D., 48 vjeç, banues në Mirditë, i cili ndodhet në spital jashtë rrezikut për jetën.
Me marrjen e njoftimit shërbimet e policisë së Komisariatit të Policisë Delvinë dhe Specialistët e Sektorit Kundër Krimeve të Rënda në Komisariatin e Policisë Sarandë kanë shkuar menjëherë në vendngjarje, ku falë veprimeve të shpejta e profesionale kanë bërë të mundur kapjen dhe arrestimin e autorit të dyshuar K.N., 73 vjeç, banues në fshatin Kopaçëz, si dhe bllokimin e armës së zjarrit tip Kallashnikov që ka kryer plagosjen.
Grupi hetimor ndodhet në vendngjarje dhe po punon për sqarimin e rrethanave.
Materialet do t’i kalojnë Prokurorisë për veprime të mëtejshme për veprat penale “Vrasje me dashje e mbetur në tentativë” dhe “Armëmbajtje pa leje”.
