Sekuestrohen 25.000 euro, kapet 46-vjeçari dhe bullgarja, ja ku i kishin fshehur

Ditën e sotme policia kufitare në Korcë ka sekuestruar 25 mijë euro të cilat ishin të padeklaruara.

Mësohet se J. R., 46 vjeç, nga Memaliaj, rezident në Greqi dhe shtetasja bullgare D. D., 31 vjeç, po udhëtonin për në Greqi, por nuk i kanë deklaruar paratë, duke i fshehur kështu në trup.

Të dy po udhëtonin me një makinë private dhe tashmë policia ka nisur procedimin penal ndaj tyre.

NJOFTIMI ZYRTAR I POLICISE

“Vijon kontrolli i imtësishëm i mjeteve dhe qytetarëve, me qëllim parandalimin dhe goditjen e paligjshmërisë. Sekuestrohen nga Policia Kufitare 25000 euro. Procedohen penalisht 2 poseduesit, të cilët nuk i deklaruan në kufi. Në vijim të kontrolleve të imtësishme, me qëllim parandalimin e krimeve ndërkufitare, shërbimet e Policisë Kufitare në P.K.K Kapshticë, në dalje të Republikës së Shqipërisë, përzgjodhën për kontroll në vijën e dytë shtetasin J. R., 46 vjeç, nga Memaliaj, rezident në Greqi dhe shtetasen bullgare D. D., 31 vjeçe, të cilët udhëtonin me mjetin e tyre.

Gjatë kontrollit të ushtruar nga shërbimet e Policisë Kufitare, në bashkëpunim me shërbimet doganore, këtyre shtetasve iu gjet një sasi prej 25000 eurosh, të fshehura në trup, të cilat nuk i kishin deklaruar para autoriteteve. Veprimet në lidhje më këtë rast janë kryer nga specialistët e Seksionit të Krimit Ekonomik në DVP Korçë, të cilët kanë filluar procedimin penal ndaj këtyre shtetasve.