Ditën e sotme policia ka zbardhur grabitjen me dhunë të ndodhur në Memaliaj dy ditë më parë.
Mësohet se uniformat blu kanë vënë në pranga 3 autorët si dhe një tjetër e kanë shpallur në kërkim.
Gjithashtu është sekuestruar 1 automjet, një pjesë e lekëve të vjedhura dhe 4 celularë.
Në automjet u gjetën dhe u sekuestruan dy doza me lëndë narkotike kokainë.
Kujtojmë se i moshuari që ra pre e grabitjes me dhunë në banesën e tij është 87-vjecari Hiqmet Ramadani, ku autorët kanë marrë 1.2 milionë lekë të reja, të vendosura në një valixhe ku mbaheshin kursimet e familjes.
NJOFTIMI ZYRTAR I POLICISE SE GJIROKASTRES
DVP Gjirokastër, në bashkëpunim të ngushtë me Prokurorinë pranë Gjykatës së Shkallës së Parë Gjirokastër, Stacionin e Policisë Memaliaj, Komisariatin e Policisë Tepelenë dhe DVP Durrës, pas një pune të mirëorganizuar hetimore për zbardhjen, dokumentimin dhe vënien para përgjegjësisë ligjore të autorëve të vjedhjes me dhunë të banesës së shtetasit H. R., finalizoi me sukses operacionin policor të koduar ‘ETALON’.
Si rezultat i operacionit u arrestuan shtetasit: E. A., 23 vjeç, A. R., 22 vjeç dhe F. R., 28 vjeç, banues në Durrës, si dhe u shpall në kërkim 1 shtetas tjetër dhe vijon puna për kapjen e tij.
Këta shtetas, në bashkëpunim me njëri-tjetrin, në datën 04.01.2020, kanë hyrë në banesën e shtetasit H. R., në Memaliaj, ku kanë vjedhur me dhunë një sasi lekësh.
Në cilësinë e provës materiale u sekuestruan një automjet, një pjesë e lekëve të vjedhura dhe 4 celularë. Gjithashtu, në automjet u gjetën dhe u sekuestruan dhe dy doza me lëndë të dyshuar narkotike kokainë.
Zbardhja e ngjarjes në kohë, si dhe kapja e autorëve, u bë falë një pune të mirëorganizuar nga një grup i posaçëm hetimor i DVP Gjirokastër, nën drejtimin e Prokurorisë së Rrethit Gjyqësor Gjirokastër, si dhe bashkëpunimit mjaft të mirë me DVP Durrës.
Ky grup, me pseudonimin ‘Etalon’, dyshohet se ka kryer dhe një sërë vjedhjesh të tjera në qarqe të ndryshme, për të cilat vijon puna për zbardhjen dhe dokumentimin me prova ligjore.
Materialet në ngarkim të këtyre shtetasve i kaluan Prokurorisë pranë Gjykatës së Shkallës së Parë Gjirokastër, për veprat penale ‘Vjedhja me dhunë’ e kryer në bashkëpunim dhe ‘Prodhimi dhe shitje e lëndëve narkotike’.
