LIGJET E BIZNESIT
Të tjera detaje janë zbardhur nga aksioni i RENEA-s, ndodhur pak ditë më parë ku në pranga ra Xhevahir Jonuzi.
Ky i fundit, ishte i dënuar me 25 vite burg për një vrasje të ndodhur në vitin 1999. Sipas informacioneve të deritanishme, mësohet se Jonuzi ka qëlluar dy herë me pistoletë mbi forcat RENEA. Efektivët e policisë, gjatë kundërpërgjigjes e qëlluan me një plumb në këmbë duke e lënë të plagosur.
Ndërkohë, pas arrestimit forcat e RENEA i gjetën dhe sekuestruan Jonuzit një armë TT, një pale dylbi, si dhe një pasaportë biometrike me emrin Sutki Lala nga Sukthi.
Fillimisht, uniformat blu rrethuan banesën e 47-vjeçarit duke i bërë thirrje të dorëzohej dhe të hidhte armën, por duket se Jonuzi ka refuzuar duke qëlluar në drejtim të policisë. Përpjekjet për ta neutralizuar situatën, policia e qëlloi të shumëkërkuarin në këmbë duke e lënë të plagosur. Nën masa të shumta sigurie ai u soll në Burgun e Sigurisë së Lartë Tiranë për të vuajtur dënimin.
Xhevahir Jonuzi është dënuar në mungesë me 25 vite burg për veprën penale “Vrasje me paramendim”. Pas një konflikti, 47-vjeçari në bashkëpunim me një person tjetër kanë vrarë Shezai Belaj dhe Shkëlqim Gurhanaj.
Ndaj Jonuzit ka pasur edhe një masë arresti me burg nga Gjykata e Vlorës për vepra të tjera penale “Prodhimi dhe shitja e lëndëve narkotike” dhe “Kultivimi i bimëve narkotike”. Ai ishte edhe në listën e 8 personave me rrezikshmëri shumë të lartë në qarkun Vlorë të shpallur në kërkim.
