Ish-kreu i Institutit për Krimet dhe Pasojat në Komunizëm dhe shkrimtari i njohur Agron Tufa, ka publikuar sot një dokument ku akuzon një prej drejtuesve të lartë të Policisë së Shtetit, Xhavit Shalën.
Duke iu referuar dokumentit publikuar nga Tufa, Shala ka qenë ish-oficer i Sigurimit të Shtetit. Më tej, shkrimtari i drejton disa pyetje Shalës, duke i kërkuar të tregojë se cilin ka përgjuar në zyrën përballë pallatit.
“Postcriptum 1: nga “Punët dhe ditët” e ish oficerit të Sigurimit, shokut Xhavit Shala, sot Drejtor i lartë i Policisë së Shtetit dhe disa pyetje të karakterit mistik për shokun Xhavit:
1. Kë/cilët do të përgjonte punëtori i zellshëm operativ, shoku Xhavit, në zyrën e “pallatit përballë”?
2. “Zyra siguron kushte normale për ruajtjen e sekretit”. – Çfarë sekreti duhej të ruhej vallë?
3. Kush/cili nga punëtorët operativë e spiunonte tjetrin – Niko Subashi Xhavit Shalën apo Xhaviti Nikon? Ndoshta të dy ndësjelltësisht? Ndoshta asnjëri?
4. A i përdor ende punëtori i partishëm operativ i Sigurimit ish bp-të e tij nga Elbasani, për të shkruar e përhapur skenarë nëpër shtypin shqiptar kundër armiqve të Sigurimit dhe Rilindjes? Cilët janë pseudonimet e tyre? Shënim: Kujdes me përgjigjet! Partia të kap në flagrancë me zemër të pasinqertë! Dhe t’i zbraz pikë-pikë të vërtetat e tmerrshme. Të pashterrshme!”, shkruan Tufa
