Kryetari i grupit parlamentar të Partisë Socialiste, Taulant Balla ka komentuar sot videon për të cilën thuhet se shfaqet kryebashkiaku i Bulqizës Lefter Alla duke konsumuar kokainë.
Balla është shprehur në një prononcim përpara gazetarëve se e vlerëson nisjen e hetimeve nga SPAK si një hap të rëndësishëm në drejtësinë shqiptare.
Në të njëjtën kohë numri 2 i Partisë Socialiste, ka paralajmëruar se nëse akuzat ndaj Allës do të vërtetohen, reagimi i forcës politike që ai përfaqëson do të jetë i ashpër.
“Prej dhjetorit 2019 kur ka filluar puna SPAK, subjekti i së cilës janë nga presidenti tek të zgjedhurit vendorë, duhet të pranojë një standard ndryshe nga ai që ka qenë. Unë dua ta përshëndes SPAK për fillimin e një hetimi të plotë.
PS nuk do të marrë kurrë në mbrojtje askënd. Unë nuk di pistat ku po heton prokuroria. Sapo prokuroria të ketë ngritur akuza reagimi im do të jetë i ashpër. Bashkohem me qytetarët e Bulqizës për të ndjerë neveri nëse vërtetohet ashtu si ndjejmë neveri për partitë që po e përdorin.
Unë nuk i kthej asnjë përgjigje Partisë Demokratike. PD ka akuzuar kreun e Bashkisë së Vaut të Dejës dhe prej 6 muajsh nuk është vërtetuar asnjë akuzë. Ju thatë 5, mund të ketë edhe 55, por tani kemi organet e drejtësisë për t’i shkuar deri në fund.
Rast i djeshëm është një rast për të vërtetuar se çështjeve nuk mbyllen me një akuzë politike. Ajo që duam ne është se nëse vërtetohen akuzat është që dënimi të jetë i ashpër“, tha Balla.
