“Po vij në Tiranë” flet kryebashkiaku Alla pas publikimit të videos: Do padis Ervin Salianjin, kam një vit që e di..

Kryebashkiaku i Bulqizës Lefter Alla ka reaguar sërish për videon që u publikua, për të cilën thuhej se shfaqej ai duke konsumuar kokainë në ambientet e një lokali.

Ai sqaron me anë të një reagimi në rrjetet sociale se është nisur tashmë drejt Tiranës për të paditur ish-deputetin e Partisë Demokratike Ervin Salianji.

Alla shton ndër të tjera se është në dijeni prej një viti për ekzistencën e një video-montazhi.

“Dua të informoj opinion publik të Bulqizës dhe të gjithë Shqipërisë, me të drejtë të shokuar nga një video-montazh të publikuar në bashkëpunim nga Partia Demokratike dhe një televizion lokal, se sot jam nisur drejt Tiranës ku do të depozitoj një padi në ngarkim të shtetasit Ervin Salianji, një person me aktivitet përsëritës kriminal për situata të ngjashme, referuar organeve të drejtësisë shqiptare.

Dua të sqaroj gjithashtu se ekzistenca e një video-montazhi më është bërë me dije prej rreth një viti, por gjithmonë kam besuar dhe besoj se duhet të jetë drejtësia ajo që ta hetojë dhe ta zbardhë.

Prandaj deklaroj se unë do të pres zbardhjen e çdo vepre penale nga drejtësia.

Kushdo që më akuzon mua të presë veprimet e Prokurorisë dhe vendimin përkatës të Gjykatës.”, shkruan Lefter Alla.