Gjatë konferencës së sotme me kryeministrin Edi Rama, Charles Michel u shpreh se ende nuk ka një vendim unanim nga shtetet e Bashkimit Europian për hapjen e negociatave me Shqipërinë.
“Ne kemi nevojë në KiE për një vendim, që është shumë e rëndësishme që të gjitha vendet të aderojnë në këtë drejtim. Tre shtyllat që thash më lartë duhet të ecin paralelisht. Ka filluar puna. Shumë shpejt do të kemi rastin që të kemi një diskutim. Do jetë pjesë e punës sime se si mund të bëhen hapa para. Si president i KiE mund të them se sot nuk kemi unanimitet”, u shpreh Michel gjatë konferencës.
Nga ana tjetër kryeministri Edi Rama u pyet nëse do të marrë takime lobuese për hapjen e negociatave dhe pranoi që në këto kushte as Franca nuk do të pranohej nga vetë Franca si shtet për të hyrë në Bashkimin Europian.
“Në këto kushte edhe Franca të kërkonte të futej në BE nuk do pranohej nga Franca. Është një vendim brenda BE dhe duhet ta respektojmë. Ajo që po ndodh në funksion të një metodologjie të re duhet parë si një mundësi e re e marrëdhënieve tona me BE.
Ne do vazhdojmë të bëjmë të njëjtën gjë që do kishim bërë edhe nëse do kishim hapur negociatat. Ka një qartësi për faktin se reformat tona po ecin, se rezultatet e pritura po vijnë dhe do vazhdojnë të vijnë”., deklaroi Rama.
