Nuk janë të pakta skandalet në politikën shqiptare, ku edhe ky më i fundit mund të klasifikohet lehtësisht si një i tillë.

Bëhet fjalë për ish-kryebashkiakun e Vorës, Agim Kajmaku, i cili prej kohësh është në kërkim nga policia.

Por pavarësisht situatës në fjalë, biznesi i tij familjar vijon të funksionojë në mënyrë normale,madje  fiton tender nga i njëjti institucion që supozohet se po kërkon ish-pronarin e tij.

Ashtu si shihet dhe në buletinin e fundit të Agjencisë së Prokurimeve Publike rezulton që kompania “Kajmaku sh.p.k” ka fituar një tender me vlerë pak më shumë se 5 milion lekë për mirëmbajtjen e luleve dhe hapësirave të gjelbërta në territorin e QSUT.

Siç pasqyrohet edhe në ekstraktin e QKB-së, Kompania “Kajmaku sh.p.k” me nipt “K83725201G” është në pronësi të Merita Kajmakut, bashkëshortes së ish-kryebashkiakut të Vorës, Agim Kajmaku.

Tenderi është prokuruar nga Agjencia e Blerjeve të Përqëndruara, një institucion që varet nga ministria e Brendshme, njësoj si policia që prej kohësh tashmë po kërkon Agim Kajmakun.

Kajmaku është larguar nga biznesi duke dhënë dorëheqjen dhe duke kaluar aksionet në pronësi të bashkëshortes që vitin e kaluar në korrik.

Agim Kajmaku u shkarkua fillimisht nga detyra për mos deklarim të dënimit duke shkelur ligjin për dekriminalizimin. Më pas u zbulua se ai kishte falsifikuar dokumentet duke ushtruar detyrën e kryebashkiakut të Vorës dhe pas shkarkimit.

Është pikërisht kjo akuzë, për të cilën policia i është vënë pas ish-kryebashkiakut të Vorës, ndërkohë që bashkëshortja vijon të marrë fonde publike nga Ministria e Brendshme.