Mbi 1 ton kokainë në Greqi/ Arrstohen 8 shqiptarë dhe marokenë

Mbrëmjen e djeshme është zhvilluar një operacion në Greqi, ku janë sekuestruar 1 ton e 181 kg kokainë. Mësohet se janë vendosur në pranga tetë trafikantë, shqiptarë dhe marokenë.

Droga ishte fshehur në një kompleks dhomash plazhi të marrë me qira në fshatin Astakos pranë qytetit të Agrinjos.

Sipas medieve greke origjina e kokainës ishte nga Karaibet, ishujt Shën Vincent, ndërsa nga andej ishte transportuar me jaht drejt Greqisë nga karteli, që kishte drejtues një shqiptar. Operacioni u zhvillua në bashkëpunim me DEA-n amerikane në Agrinjo, pranë Patras.

Por operacioni ende nuk ka përfunduar, pasi në kërkim është shpallur një 42-vjeçar grek. “Autoritetet greke po bashkëpunojnë në hetime për rastin edhe me palën shqiptare dhe atë spanjolle” citojnë mediet greke burime nga autoritetet në Athinë. Në shtator të vitit të kaluar u zbulua në portin e Pireut një tjetër sasie e madhe kokaine që ishte nisur nga Ekuadori me destinacion Durrësin.

Gjithashtu, ditën e djeshme, policia greke ka zbuluar një tjetër bandë shqiptaro-greke që trafikonte heroinë në Selanik, duke kapur rreth 24 kg heroinë. Në pranga të policisë kanë rënë 7 persona nga të cilët 4 shqiptarë dhe 3 grekë. Sipas policisë helene banda furnizohej me drogë nga Shqipëria dhe e shpërndante në qytetin e Selanikut dhe në disa qytete të tjera të Greqisë Veriore.