Lirimi i Endrit Dokles, Gjonaj: Kishim indicie nga burgu, kërkova përshpejtimin e vettingut për gjyqtaren

Ministrja e Drejtësisë Etilda Gjonaj, e ftuar në emisionin “Kjo Javë” në News24, foli për çështjen e lirimit të Dokles që bëri bujë në media pasi ai vuante dënimin me burgim të përjetshëm për një seri vrasjesh të kryera në kuadër të bandës së Durrësit.

Ndër të tjera, Gjonaj thotë se ka pasur indicie se i dënuari Endrit Dokle mund të lirohej para kohe, dhe rasti është referuar të institucionet e Drejtësisë. Ndërkohë për gjyqtaren që liroi Doklen, Enkelejda Hoxha, ministrja ka thënë se i ka kërkuar ONM që ajo të përfshihet në mënyrë prioritare në vetting.

“Për çështjen Dokle ne kemi pasur një sinjalizim dhe më herët nga drejtoria e burgjeve dhe e shërbimit të provës ku ka pasur një indicie të cilën e kemi referuar si shqetësim tek institucionet e drejtësisë. Ka qenë një indicie që mund të lirohej subjekti. Kur është dhënë vendimi nga gjyqtarja kam filluar një hetim administrativ. Nga verifikimi paraprak që kemi kryer ka rezultuar që vendimi i gjyqtares është marrë në kundërshtim me kodin penal dhe vendimet unifikuese të Gjykatës së Lartë. I jam drejtuar të gjitha institucioneve të drejtësisë edhe KLGJ që të marrë menjëherë masën për pezullimin e gjyqtares dhe KLP dhe ONM me qëllim që këtë gjyqtare apo subjekte të tjera t’i përfshijnë në mënyrë prioritare për vetting”, është shprehur Etilda Gjonaj.