Kosovë/ Presidenti Meta: Të mos harrojmë masakrën e Reçakut

Presidenti i Republikës së Shqipërisë Ilir Meta, ka udhëtuar drejt Kosovës për të qenë i pranishëm në Ditën e Përkujtimit të Gjenocidit ndaj Shqiptarëve në Kosovë.

Meta është takuar me familjarë të viktimave si dhe liderat politikë në Kosovë. Kreu i shtetit ka thënë se shqiptarët nuk duhet të harrojnë masakrën e Reçakut, si domosdoshmëri për të mos lejuar përsëritjen e saj.

Masakra e Reçakut, një nga më të rëndat e kryera nga ushtria serbe në Kosovë, u mohua pak kohë më parë nga presidenti i Serbisë, Aleksandër Vuçiç, i cili e quajti inskenim.

Pjesë nga fjala e Metës:

Në Ditën e Përkujtimit të Gjenocidit ndaj Shqiptarëve në Kosovë, me dhimbje të madhe, respekt e mirënjohje të thellë nderuam sot kujtimin e 45 civilëve të pafajshëm që humbën jetën në Masakrën e Reçakut, si dhe të gjitha viktimat e martirët e krimeve monstruoze të forcave serbe në Kosovë, simboli i një sakrifice tejet sublime të rrugëtimit të këtij shteti drejt lirisë dhe pavarësisë.

Masakra e Reçakut, nuk duhet harruar, si domosdoshmëri për të mos lejuar përsëritjen e saj në të ardhmen.

Dhe ne do t’i kujtojmë gjithmonë, jo vetëm jetët e humbura dhe sakrificat e tyre, por edhe gjithë këto të vërteta të patundura mbi të cilat ndërtohet një bashkëjetesë në paqe, e fortë dhe e qëndrueshme, në rajonin tonë.

Rroftë e ardhmja europiane e Kosovës që qëndron e patundur mbi këto sakrifica!