“Kanë shqyer derën, e kanë grabitur” dëshmia tronditëse e kunatit të gruas që u vra nga nipi i burrit: Ishte i keq, pinte drogë

Detaje tronditëse vijojnë të dalin në lidhje me krimin makabër që shokoi ditën e djeshme Mallakastrën dhe mbarë opinionin publik, ku 51-vjeçarja Drita Saliaj u gjet e pajetë në një rezervuar, të cilin nipi i burrit e lidhi dhe e hodhi në rezervuar, pasi i grabiti banesën së bashku me dy shokë.

Kunati i viktimës, ka mbërritur sot nga Greqia për në fshatin Gjerbës të Mallakastrës ku ka konstatuar dhe grabitjen e banesës së tij.

Mitat Saliaj shprehet se ka gjithashtu një banesë në fshat ku  dyshohet se ka rënë pre e grabitjes nga po të njëjtët autorë të vrasjes së 51 vjeçares.

Ai deklaron se nipi ka qenë djalë i keq dhe përdorues i drogës, madje dhe të atin e ka në burg.

“Unë isha tek djali në Greqi. E kam kunatë Dritën. Erdha të hapja derën, e kanë shqyer derën, e kanë grabitur. Kisha gjëra në shtëpi, motorsharra, korrëse bari, mbi 2-3 milionë gjëra kisha. Se di akoma çfarë kanë marrë. Kur isha në Shqipëri vija çdo 2 javë.
Edhe mund të jenë ata djem. Ky nipi nuk ka qenë djalë i mirë. Të tërë këta që kanë bërë këtë gjë ashtu kanë qenë. Çun i keq, drogë e të gjitha gjërat i ka bërë. Të atin e ka brenda”, tha Saliaj në një prononcim për mediat.