Era e fortë pushton vendin, rrëzon pemën e “Vitit të Ri”

Ditën e sotme, i gjithë vendi është përfshirë nga mot ii keq. Kryesisht në vendet malore kanë nisur rreshjet e dëborës, ndërsa në Durrës dhe Tiranë dita e sotme ka qenë e shoqëruar nga era e fortë.

Kjo gjë ka shkaktuar edhe rrëzimin e pemës së “Vitit të Ri” në sheshin Skënderbej në Tiranë.

Sipas Institutit meteorologjik era e fortë që ka përfshirë vendin do fryjë mesatare në tokë deri e fortë në det me shpejtësi 45-50 km/h, duke krijuar kështu edhe në det dallgë 4-5 ballë.

Ndërkohë Drejtoria e Përgjithshme Detare ka njoftuar se Porti i Durrësit është i hapur dhe në gatishmëri por për arsye të mbylljes së portit të Barit do ndalojnë nisjen e trageteve nga Durrësi për në Bari për të shmangur qëndrimin e trageteve dhe të pasagjerëve në radën e portit te Barit.

Gjitashtu edhe te kryqëzimi i rrugës Myslym Shyri pranë ‘Tajvanit’, një pemë është rrëzuar krejtësisht për shkak të erës së fortë.