Kryetari i Lëvizjes Vetëvendosje në Kosovë, Albin Kurti me anë të një video-mesazhi ka bërë me dije se është tërhequr nga kërkesa e tij për të patur nga rradhët e partisë së tij Ministrinë e Brendshme.
Kështu, ai i ka bërë thirrje Lëvizjes Demokratike të Kosovës dhe liderit të saj Isa Mustafa që të dërgojë emrin për zëvëendës kryeministrin dhe 5 ministrave që do të ketë në kabinetin qeveritar.
Ndër të tjera Kurti theksoi se nuk ka më kohë për të humbur dhe është gati për të formuar qeverinë e re dhe të nisë punën për krijimin e saj.
‘Sot u bënë tre muaj nga zgjedhjet e 6 tetorit të vitit të kaluar, kur qytetarët masivisht votuan edhe për ndryshime politike në vend edhe e bënë Lëvizjen VETËVENDOSJE! subjekt të parë e fitues. Më 26 dhjetor 2019, në seancën konstituive të legjislaturës së shtatë u detyruam të shkojmë pa marrëveshje me LDK-në. Sot, më 6 janar 2020, në takim konsultativ me Presidentin e Republikës, sërish jam i detyruar të shkoj pa marrëveshje me LDK-në. Përkundër përpjekjeve të mia të vazhdueshme, nuk m’u bë e mundur të kem një takim me kryetarin e LDK-së para këtij takimi të sotëm me Presidentin e shtetit.
Askush prej nesh nuk e ka menduar që viti i ri 2020 do të na zë pa qeveri. Si Kryeministër i ardhshëm i Republikës së Kosovës, si përfaqësues i juaji politik që ka marrë më së shumti vota në dy palë zgjedhjet e fundit parlamentare, theksoj se nuk kemi kohë për të humbur. Koha që po ikën pa kthim nuk është kohë private e individuale e politikanëve, por është kohë e shtetit dhe kohë publike, e të gjithëve e për të gjithë. I bëj thirrje udhëheqjes së LDK-së që sa më parë t’m’i dërgojë emrat e pesë ministrave të saj dhe të zëvendëskryeministrit apo të zëvendëskryeministres së parë nga radhët e saj’, ku shpreh Albin Kurti.
