Ditmir Bushati kthehet pas në kohë, kujton tre 21 Janarët e shqiptarëve

Ish-ministri i Jashtëm Ditmir Bushati, në ditën që kalendari shënon sot 21 janar, ka sjellë në kujtesë 3 ngjarje të hidhura dhe historike që kanë përshkruar kombin shqiptar.

Bushati është kthyer pas në kohë duke i renditur këto tre ngjarje.

Sipas tij ngjarja  e parë është ajo e 100 vjetorit të Kongresit të Lushnjes, që sipas Bushatit është një ngjarje që na nderon, dhe dëshmon maturinë e politikës dhe njerëzve të mençur.

Ndërsa e dyta lidhet me ndarjen nga jeta të Ibrahim Rugovës, i cili udhëhoqi rezistencën e shqiptarëve të Kosovës ndaj Serbisë.

E  treta është pikërisht 21 Janari i 2011-s që lidhet me vrasjen e katër protestuesve në Bulevard, dhe sipas Bushatit na turpëron sa kohë që drejtësia nuk është vendosur.

REAGIMI I PLOTE I DITMIR BUSHATIT

21 Janarët!

I pari na nderon. 100 vjetori i Kongresit të Lushnjes është dëshmi e maturisë politike të njerëzve të mençur që ditën të bëhen bashkë për fatet e Shqipërisë në momente kritike.

I dyti na dhemb. Pasi lidhet me ndarjen nga jeta të Ibrahim Rugovës, në 2006-ën. Personalitetit që udhëhoqi rezistencën ndaj Serbisë e që ndërkombëtarizoi çështjen e Kosovës.

I treti na turpëron. Sepse më 21 Janar 2011, shteti vrau 4 protestues të pafajshëm dhe drejtësia ende nuk e ka thënë fjalën e saj.