Detaje/ Aksidenti tragjik në Koplik, viktima ishte bashkëshortja e shoferit

Të tjera detaje janë zbuluar nga aksidenti i kësaj të mërkure në aksin rrugor Koplik-Dedaj. Nga ky aksident humbi jetën një 57-vjeçare. Ngjarja ka ndodhur si pasojë e humbjes së kontrollit të makinës nga drejtuesi.

Ndërkohë më parë ngjarja u raportua se nga aksidenti kishte humbur jetën një këmbësore, por që sipas policisë tashmë rezulton se viktima ka qenë bashkëshortja e drejtuesit të mjetit, e cila pas humbjes së rrotullimit të makinës ka dalë nga mjeti, duke përfunduar në rrugë.

Njoftimi policisë:

Ne vijim të informacionit  të dhënë në lidhje me aksidentin e ndodhur në aksin rrugor Koplik-Dedaj, në vendin e quajtur “Ura e Zhajës”, fshati   Zagorë , Malësia e Madhe  ju informojmë se:

Nga hetimet paraprake dhe nga deklarimet e drejtuesit te mjetit, mësohet se drejtuesi i mjetit  ka humbur kontrollin mbi mjetin dhe për pasojë mjeti është  përplasur me sinjalistikën anësore,  dhe  ka dalë në  skarpatin e rrugës. Në automjet udhëtonte edhe bashkëshortja e  tij,  shtetasja Gj. D. 57 vjeçe e cila ka dalë nga mjeti gjatë rrotullimit duke gjetur vdekjen e menjëhershme.