Çfarë po ndodh te Tregu Elektrik? Forcat e policisë rrethojnë zonën

Një situatë e tensionuar është ajo që paraqitet mëngjesin e sotëm në Tregun elektrik të Tiranës.

Bashkia e Tiranës ka urdhëruar tregtarët që të lirojnë ambientet, pasi shembja e tyre ishte planifikuar për në orën 10 të mëngjesit të sotëm.

Tregtarët kanë vendosur të dalin në protestë dhe të refuzojnë zbatimin e këtij urdhëri.

Sipas këtij urdhëri, fadromat duhet të nisnin sot shembjen dhe tregtarët duhet të boshatisnin ambientet në orën 09.00.

Nga  ana tjetër, vetë tregtarët shprehen se nuk kanë asnjë informacion se ku do të shkojnë së bashku me mallrat që kanë dhe nuk dinë asgjë se ku duhet ti zhvendosin bizneset e tyre.

“Ky është një turp që bën bashkia. Janë 232 veta që punojnë këtu. Ne i dhamë votën për më mirë jo të na lërë në mes të rrugëve. Po bëjnë masakër me tregtarët”, tha një përfaqësues i tregtarëve për Ora Neës.’

Në fillim tregtarët kanë dalë në protestë në zonën e “Ali Demit” dhe më pas kanë shkuar përpara godinës së Bashkisë Tiranë.

Ata pretendojnë se nuk kanë firmosur asnjë peticion për prishjen e tregut.