Kanë dalë detaje të reja në lidhje me vrasjen që tronditi Tropojën mbrëmjen e djeshme.
Viktima është Guxim Gjyriqi, 47 vjeç pronari i një lokali dhe pikë karburanti në qytet.
Gjyriqi është ekzekutuar me armë zjarri nga persona ende të panjohur, në afërsi të rrugës së spitalit, aty ku ndodhen edhe bizneset e tij.
Mësohet se ai njihej si një person i qetë dhe jo problematik në lagjen “Partizani” në të cilën jetonte.
Gjyriqi ishte djali i tezes së Fatmir Haklajt, fis i njohur ky jo vetëm në Tropojë por në gjithë veriun e Shqipërisë, për shkak të trazirave në vitin famëkeq 1997.
Asokohe Fatmir Haklaj drejtonte policinë e Tropojës, por më pas djemtë e kësaj familjeje, u ekzekutuan një nga një.
Ende nuk dihen rrethanat e vrasjes, ndërkohë që policia po punon për zbardhjen e plotë të ngjarjes.
Shërbimet e Komisariatit të Policisë Tropojë, shërbimet e DVP Kukës, dy grupe të FNSH, vazhdojnë kontrollet dhe krehjen e zonës për të bërë të mundur kapjen e autorit.
NJOFTIMI ZYRTAR I POLICISE
Më datë 05.01.2020, në orën 23:32, në afërsi të Karburantit të tij, në lagjen “Partizani” , është vrarë me armë zjarri në rrethana ende të paqarta, shtetasi G.Gj., 47 vjeç, banues në qytetin e Tropojës.
Në vendngjarje ndodhet grupi hetimor ku vijon punën për zbardhjen e rrethanave të ngjarjes, identifikimin dhe kapjen e autorit.
Shërbimet e Komisariatit të Policisë Tropojë, shërbimet e DVP Kukës, dy grupe të FNSH, vazhdojnë kontrollet dhe krehjen e zonës për të bërë të mundur kapjen e autorit.
