“Zgjedha e minishejtanit”/ Fuga: Kosova s’mund të rifutet nën sqetullën e vëllaçkos së madh

Akademiku Artan Fuga ka ironizuar takimin e minishengenit të mbajtur në Tiranë fundjavën e kaluar. Në “Facebook”, Fuga ka komentuar qëndrimin e Kosovës, ndërsa ka deklaruar se kosovarët nuk janë idiotë që të futen sërish nën varësinë e Serbisë, pasi u shpallën shtet i pavarur.

“Pse idiotë janë kosovarët që pasi fituan me gjak e sakrifica me mbështetjen amerikane dhe perëndimore pavarësine, një rast që nuk vinte prej dekadash të tëra, pa asnjë garanci formale dhe juridike ndërkombëtare, ta humbisnin sovranitetin në vendimmarrje ekonomike, politike, sociale duke futur kokën nën zgjedhën e minishejtanit?

Ende pa iu njohur pavarësia dhe territori nga BE, dhe nga OKB? Apo pasi dolën shtet më vete të rifuten andej nga dolën që t’u ndodhi si republikave ish sovjetike të Azerbajxhanit, Kazakistanit, etj, që ekonomikisht sapo dolën rihynë përsëri nën sqetullën e vëllaçkos të madh? Fët e fët.

Kjo do ngjante sikurse një gruaje që e rreh burri, të divorcohet me mbështetjen e opinionit të lagjes, por pasi e bën këtë, pa u tharë vula te noteri, i mungon burri, rikthehet te ai, i hidhet në qafë duke i thënë: rrihmë, rrihmë i dashur!”, ka shkruar Artan Fuga.