Gjatë fjalimit të saj nga foltorja e Kuvendit, në seancën e sotme parlamentare, deputetja e opozitës së re, Edlira Hyseni nuk ka mundur të mbajë dot lotët teksa ka folur për tërmetin tragjik që goditi Shqipërinë më 26 nëntor.
Ajo u shpreh me zë të dridhur se Durrësi ka nevojë për dashuri që të ringrihet sërish pas kësaj tragjedia dhe për këtë I duhet një qeveri dhe besimi, dhe jo ndarja politike.
“Unë jam prind, jam nënë dhe në këtë situatë patëm emergjencën të kujdeseshim për jetën.
Në katër të mëngjesit nuk kishte ndarje politike. Njerëzit kanë humbur shumë në të gjitha drejtimet dhe sot Durrësi ka nevojë të rigjejë besimin. Durrësi ka nevojë për një shtet për një qeveri që do t’i përgjigjet, ka nevojë për dashuri. Unë nuk dua të besoj që do preken ato lekë për personat e prekur nga tërmeti.
Durrësi ka nevojë edhe për të gjetur drejtësi por prioritet është rikthimi në normalitet. Shkollat në Durrës janë të dëmtuara. Prindërit kanë frikë të rikthejnë fëmijët në shkollë. Kanë rënë pallate që janë ndërtuar në 10-vjeçarin e fundit. Kemi nevojë të besojmë tek qeveria”, tha deputetja.
